ცხოვრებისეული შემთხვევებისა და ფაქტების სამართლებრივი ამოხსნის სურვილი და მათი სამართლებრივი ნორმით გადაჭრის შინაგანი მოთხოვნილება, ალბათ, ქვეცნობიერად არის იმ ადამიანთა უმრავლესობაში, რომლებიც სამართლის მიმართულებას, იურისტის პროფესიას ირჩევენ. ქართული უნივერსიტეტის სამართლის მიმართულების კურსდამთავრებული, ქეთი ხურცილავა, ამჟამად მშობლიური უნივერსიტეტის ჰუმანიტარულ მეცნიერებათა და სამართლის სკოლის კოორდინატორი, იხსენებს, როგორ დაინტერესდა ამ პროფესიით, როგორ დაძლია სირთულეები და რამდენად საპასუხისმგებლოა, ატარო ყოფილი ლექტორების კოლეგის სტატუსი.
ქეთევან მოგესალმები!
მოგესალმებით.
რატომ აირჩიე SANGU-ს სამართლის მიმართულება?
მატერიალურ სამყაროში „სამართალმცოდნეობა“ საერო-სამოქალაქო ცხოვრების წესების წიგნია, სადაც პასუხი ყველა კითხვაზე არსებობს. სწორედ ამ მიზეზით დავინტერესდი ამ სფეროთი. SANGU-ში ლოგიკურად აღმოვჩნდი, ჭკვიანმა ადამიანებმა მირჩიეს. მინდოდა მესწავლა უნივერსიტეტში, რომელიც სტუდენტებზე იქნებოდა მორგებული და მომცემდა ხარისხიან განათლებას.
როდის მიხვდი, რომ პროფესიად სამართალი უნდა აგერჩია? სამართალმცოდნეობისადმი ინტერესი სკოლის ასაკში გამიჩნდა, როდესაც სამოქალაქო განათლების მასწავლებელმა შემოგვიტანა კაზუსი. წავიკითხე მისი შინაარსი, პირველად მაშინ გავიაზრე გამოთქმა: „ადამიანი ადამიანისთვის მგელია“ (homo homini lupus est) კაზუსი პირველად მაშინ ამოვხსენი და ეს ჩემი პირველი „მოგებული საქმე“ იყო. კვირიდან კვირამდე ველოდებოდი ახალ კაზუსს, მაშინ მივხვდი, რამდენად მნიშვნელოვანია სამართლიანი გარემო, სადაც კანონი მკაცრია, მაგრამ კანონია (dura lex,sed lex). სწორედ ეს აღმოჩნდა გარდამტეხი მომენტი, რამაც გადამაწყვეტინა ეს სფერო ამერჩია.
როგორ წარიმართა შენი სტუდენტობა SANGU-ში და რა იყო სტუდენტობის შემდეგ? არაერთი გამოწვევის წინაშე აღმოვჩნდი და შიშს ღიმილით ვმალავდი. უცხო ტერმინების, დიდი მოცულობის ინფორმაციის ათვისება მიწევდა. ახალი ურთიერთობები, დროის კონტროლი და, რა თქმა უნდა, ჩემი ლექტორები... მათ გარეშე ვერ შევდგებოდი. მათ დიდი სტიმული მომცეს მუდმივი განვითარებისკენ. ამიტომ აქვე გავაგრძელე მაგისტრატურა, რაც, რა თქმა უნდა, პროფესიული ზრდის აუცილებლობით იყო ნაკარნახევი.
რა შეგრძნება დაგეუფლა, როდესაც SANGU-ში თანამშრომლის სტატუსით დაბრუნების შესახებ გაიგე?
ბედნიერების, სიხარულის გრძნობა დამეუფლა, ისეთი კარგი სიტყვები მითხრეს, უფრო მეტი პასუხისმგებლობა ვიგრძენი. როცა გავაცნობიერე, რომ უდიდესი ადამიანების წინაშე მიწევდა თავის დამკვიდრება, რომლებსაც კოლეგად უნდა მივეღე, ცოტა ავღელდი.
როგორია შენი დღევანდელობა SANGU-ში?
ჰუმანიტარულ მეცნიერებათა და სამართლის სკოლის კოორდინატორი ვარ. საგნებთან, სილაბუსებთან, სასწავლო მასალებთან დაკავშირებით ლექტორებთან და სტუდენტებთან მიწევს მუდმივად კონტაქტი, რაც უზომოდ მახარებს. რა მიდგომა გაქვს სტუდენტებთან, ითვალისწინებ თუ არა იმას, რაც ოდესღაც შენ არ მოგწონდა და თვლიდი, რომ მათ ადგილას რაიმეს შეცვლა შეგეძლო? მე ჯერ ისევ სტუდენტი ვარ და, ამასთანავე, უნივერსიტეტის თანამშრომელი. ვცდილობ მეგობრული ურთიერთობა მქონდეს სტუდენტებთან, მაქსიმალურად ვითვალისწინებ მათ აზრს. ეს ორივე როლი ჩემია და შესაბამისად ვმოქმედებ. თუმცა, მირჩევნია ჩემი სამსახური სხვებმა შეაფასონ.
დიდი მადლობა, წარმატებებს გისურვებ.
გმადლობ.
მოამზადა ნინო აბრამიშვილმა
