SANGU-ს ბიბლიოთეკამ სტუდენტთა დასაქმების და კარიერული განვითარების მიზნით დაიწყო სტაჟირების პროგრამა საბიბლიოთეკო ფონდის მენეჯმენტის მიმართულებით. პროგრამის ფარგლებში სტაჟიორი სტუდენტები შეძლებენ შეისწავლონ წიგნადი ფონდის მართვა, წიგნების დამუშავება და ამ პროცესში ყოველდღიური ჩართულობით შეიძინონ საბიბლიოთეკო საქმიანობისთვის საჭირო უნარ-ჩვევები.
სტაჟირების პროგრამის მნიშვნელობის შესახებ SANGU-ს ბიბლიოთეკის ხელმძღვანელი ნათია სადღობელაშვილი გვესაუბრება - ბიბლიოთეკა საუნივერსიტეტო სივრცის ერთ-ერთი მნიშვნელოვანი და წარმმართველი რგოლია. მნიშვნელოვანია, იგი ვითარდებოდეს და აკმაყოფილებდეს სტუდენტთა ინტერესებს და ამავდროულად, სტუდენტებიც ხედავდნენ თავიანთ წვლილს ბიბლიოთეკის განვითარების საქმეში. ამ მიზნით, სხვადასხვა გამოკითხვის საშუალებით, მუდმივად ვცდილობთ, გავეცნოთ მათ შეხედულებებსა და მოსაზრებებს.
ამჯერად, მათი უშუალო ჩართულობისთვის, გამოვაცხადეთ სტაჟირება საბიბლიოთეკო ფონდის მენეჯმენტის მიმართულებით. ეს იქნება, მთლიანად, SANGU-ს სტუდენტური საზოგადოების ხმა ბიბლიოთეკაში, რაც მოგვცემს შესაძლებლობას, გავიგოთ, რას კითხულობენ თანამედროვე ახალგაზრდები, რა კულტურულ-საგანმანათლებლო ღონისძიებები აინტერესებთ, რა შეიძლება იყოს მათი სამომავლო გეგმები და ნაბიჯები. სტაჟირების წყალობით სტუდენტი შეძლებს გაეცნოს საბიბლიოთეკო საქმიანობას და ამ, ერთი შეხედვით, მივიწყებულ პროფესიაში დაინახოს ის შესაძლებლობები, რომლებიც განვითარებულ ქვეყნებში უკვე შემჩნეულია, რის გამოც მთელი დასავლური სამყაროს საუნივერსიტეტო ცხოვრება ეფუძნება თანამედროვე, ციფრული ტექნოლოგიებითა და რესურსებით აღჭურვილ ბიბლიოთეკას.
აღნიშნული საქმიანობით დაინტერესებული სტუდენტებისთვის ბიბლიოთეკის უკეთ გაცნობა და წიგნებთან დაახლოება საუკეთესო შესაძლებლობაა პროფესიული უნარების შეძენისა და განვითარებისთვის. ამჯერად სტაჟირების პროგრამაში წმ. ანდრიას ქართული უნივერსიტეტის ჰუმანიტარულ მეცნიერებათა და სამართლის სკოლის IV კურსის სტუდენტი, სტუდენტური თვითმმართველობის ვიცე-რეზიდენტი ევა შამხალაშვილი ჩაერთო.
ევა შამხალაშვილი - ვფიქრობ, ადამიანებს, რომელთაც წიგნებთან ურთიერთობა უყვართ, ეს ადგილი სწორედ მათთვისაა განკუთვნილი. როგორც, მომავალი ქართული ენის ფილოლოგი, დარწმუნებული ვიყავი, რომ უფრო მეტად საინტერესო და სასურველი აღმოჩნდებოდა SANGU-ს ბიბლიოთეკის კარს მიღმა ყოფნა.
ამ დროს, როცა სტუდენტთა ჟრიამული ყველაზე მეტად აკლია უნივერსიტეტს, აქ ყოფნა უცნაურია, თუმცა ის სივრცე, რომელიც ჩემთვის კარგადაა ნაცნობი და ერთ-ერთი საყვარელი ადგილიცაა SANGU-ში სასიამოვნოს ხდის თითოეულ დღეს. სრულიად ახალი გამოწვევაა ჩემთვის, ვიყო ბიბლიოთეკაში, თუმცა სხვა ამპლუაში. წიგნების დახარისხება, აღწერა, მათი შესწავლა... ურთიერთობა იმ ადამიანებთან, რომლებმაც ჩვენამდე მოიტანეს „წიგნთა საცავი“ და სურთ, მომავალ თაობასაც გადასცენ. ძალიან მომწონს დროის გატარება იმ წიგნებთან, რომლებმაც უდიდესი ისტორია და ნააზრევი შემოინახეს.
ჩემი სტაჟირება, სამწუხაროდ, 31 მაისს სრულდება. ძალიან საინტერესოა საბიბლიოთეკო საქმიანობა, რადგან წიგნებთან მუდმივი ურთიერთობით, თანაც ისეთ გარემოში, რომელსაც SANGU გვთავაზობს, ადამიანის განათლება მტკიცდება და სრულქმნილი ხდება.
დასაქმების პროექტი დასრულებისთანავე განაახლებს ახალ სტაჟიორთა შერჩევას, მანმადე კი მსურველებს შეგიძლიათ ჩაერთოთ მიმდინარე საქველმოქმედო-საგანმანათლებლო პროექტში, რომელიც მზრუნველობამოკლებული ბავშვებისთვის წიგნების შეგროვების მიმართულებით ხორციელდება. ყველა მსურველს შუძლია SANGU-ს ბიბლიოთეკაში განთავსებულ წიგნების ყუთში დატოვოს ნებისმიერი სახის ლიტერატურა და გაახაროს ადრესატი. წიგნების შეგროვება აპრილის ბოლომდე გაგრძელდება.
მოამზადა ნინო აბრამიშვილმა
