საქართველოს ბანკისა და TBSC Consulting-ის“ თანამშრომლობით, 3-4 ივნისს ჩატარდა ჰარვარდის ბიზნესქეისების რიგით მეოთხე კონკურსის ნახევარფინალური ტური, სადაც საქართველოს მასშტაბით ნახევარფინალურ ტურში გასულ გუნდებს შორის მონაწილეობას იღებდა ქართული უნივერსიტეტის გუნდი - „Future Leaders” (გუნდის წევრები: საბა კუკავა - ლიდერი, მერცია სოლოღაშვილი, მანანა ცირდავა, მარიამ ტაბატაძე). ისინი ახალ ბიზნეს სიტუაციაზე ინტენსიური მუშაობის შედეგად, 3 ივნისს წარდგნენ ჟიურის წინაშე და ქეისში არსებული პრობლემის გადასაჭრელად მათ მიერ შემუშავებული რეკომენდაციები და მისი განხორციელების გზები გააცნეს. გუნდის წევრებმა აღნიშნეს, რომ ქეისზე მუშაობამ საკმაოდ დიდი შრომა მოითხოვა. მათ გაითვალისწინეს პროფესორ ნინო დამენიას რჩევები ნახევარფინალისთვის სრულყოფილად მოსამზადებლად, გაეცნენ და შეისწავლეს ფინანსური ანალიზის სხვადასხვა გზა, რისკების შეფასების მეთოდები და მენეჯმენტის სფეროში არსებული ინოვაციური მიდგომები. „Future Leaders”-ის სპიკერმა - მერცია სოლოღაშვილმა, ნახევარფინალის შესახებ ასეთი კომენტარი გააკეთა: „ამ რაუნდისთვის დიდი ხანი ვემზადებოდით, ამაში ყველაზე დიდი წვლილი ჩვენს ლიდერს - საბას მიუძღვის, რომელიც ძალისხმევას არ იშურებდა და ამუშავებდა ფინანსურ მონაცემებს. ამჯერად გუნდის სპიკერის როლი მე მერგო და ჟიურის წინაშე პრეზენტაცია წარვადგინე. მაქსიმალურად ვეცადე თავდაჯერებული ვყოფილიყავი და ეს ასეც მოხდა.“
ფინალში გადასვლა 23-დან მხოლოდ 6 გუნდს შეეძლო. 3 ივნისს ჩატარდა პირველი ეტაპი, სადაც გამოვლინდნენ პირველ, მეორე და მესამე ადგილზე გასული გუნდები. ფინალში ავტომატურად ხვდებოდა მხოლოდ ის 2 გუნდი, რომელიც ყველაზე მაღალ შეფასებას მიიღებდა ჟიურისგან. დანარჩენი მონაწილეები კი 4 ივნისს კვლავ უნდა დაპირისპირებოდნენ ერთმანეთს და მათგან უნდა გამოვლენილიყო შემდეგი ოთხი ფინალისტი.
ქართული უნივერსიტეტის გუნდი „Future Leaders” თავდაუზოგავი შრომის შედეგად, მოხვდა საუკეთესო ორ გუნდს შორის და ავტომატურად გადავიდა კონკურსის ფინალურ ეტაპზე, სადაც ისინი უნივერსიტეტის სახელით კვლავ განაგრძობენ ასპარეზობას გამარჯვებულის ტიტულის მოსაპოვებლად.
წარმატებებს ვუსურვებთ გუნდ „Future Leaders”-ს, გვჯერა ღირსეულად წარდგებიან ფინალურ ეტაპზე და ასახელებენ მშობლიურ უნივერსიტეტს.
