3 ივლისს, საქართველოს საპატრიარქოს წმ. ანდრია პირველწოდებულის სახელობის ქართულ უნივერსიტეტში საქართველოს ფიზიკის მასწავლებელთა ასოციაციის წარდგინება გაიმართა.
აღნიშნული ასოციაცია გასული წლის დეკემბერში დაფუძნდა, დღეს კი მისმა დამფუძნებლებმა: ილიას სახელმწიფო უნივერსიტეტის პროფესორებმა მარიკა კაპანაძემ და ანდრია როგავამ, გივი ზალდასტანიშვილის სახელობის ამერიკული აკადემიის ფიზიკის მასწავლებელმა ილია მესტვირიშვილმა, ბაქსვუდის სკოლის ფიზიკის მასწავლებელმა ქეთევან ტატიშვილმა და SANGU-ს პროფესორმა ზურაბ ბერიამ პირველი საერთო კრება ჩაატარეს. მათ ასოციაციის აღმასრულებელი საბჭოს წევრებთან (ლალი ნადირაძე, პირველი კლასიკური გიმნაზიის ფიზიკის მასწავლებელი, გიორგი ჭანტურია, ბონის უნივერსიტეტის დოქტორანტი) და ასოციაციაში გაწევრიანებულ დარგის პროფესიონალ წარმომადგენლებთან ერთად სამომავლო გეგმებზე, საჯარო თუ კერძო სტრუქტურებთან შესაძლო თანამშრომლობის და ერთობლივი პროექტების განხორციელების შესახებ იმსჯელეს.
ასოციაციის წევრებს მისასალმებელი სიტყვით მიმართა და წარმატებები უსურვა SANGU-ს რექტორმა, პროფესორმა ირაკლი ბრაჭულმა.
საქართველოს ფიზიკის მასწავლებელთა ასოციაციის წარმომადგენლებმა, საქმიანობის ,,პირველ ნაბიჯებზე” გვერდში დგომისთვის, მადლიერება გამოხატეს წმ. ანდრიას ქართული უნივერსიტეტის მიმართ და სამომავლოდ ერთობლივი ღონისძიებების განხორციელების შესაძლებლობაზე ისაუბრეს.
როგორც ასოციაციის ერთ-ერთმა დამფუძნებელმა, SANGU-ს პროფესორმა ზურაბ ბერიამ ბრძანა, ასოციაციის დამფუძნებლები თავმჯდომარეს გარკვეული პერიოდულობით აირჩევენ. ამ ეტაპზე ასოციაციას ქალბატონი მარიკა კაპანაძე უხელმძღვანელებს.
ასოციაციის ერთ-ერთმა დამფუძნებელმა წევრმა, ქეთევან ტატიშვილმა ღონისძიების მონაწილეებს ასოციაციის დაარსების ისტორია გააცნო, დეტალურად ისაუბრა დამფუძნებლების და საბჭოს წევრების შესახებ.
ღონისძიებაზე სიტყვით გამოვიდნენ: მარიკა კაპანაძე, სხვა დამფუძნებლები და ასოციაციის აღმასრულებელი საბჭოს წევრები, პედაგოგები და გამომცემლები, როლებმაც თავიანთ ხედვებზე და სამომავლო გეგმებზე ისაუბრეს.
სტუმართა შორის ბრძანდებოდა ბატონი კახმეგ კუდავა, რომლის ინიციატივითაც დარბაზიდან განხორციელდა სატელეფონო ზარი შვეიცარიაში მოღვაწე ქართველ ფიზიკოს ზურაბ გუგუჩიასთან, რომელმაც საქართველოს ფიზიკის მასწავლებელთა ასოციაციის დაარსების აღსანიშნავად, ასოციაციის მიერ შერჩეულ 10 ქართველ ფიზიკის მასწავლებელს შვეიცარიაში სამუშაო ვიზიტით მიწვევა შესთავაზა.
ღონისძიების დასრულების შემდეგ სტუმრებმა SANGU-ს უახლესი ინვენტარით აღჭურვილი ფიზიკის ლაბორატორიები დაათვალიერეს. ისინი ლაბორატორიის თანამშრომლების დახმარებით ფიზიკის ექსპერიმენტებშიც ჩაერთვნენ. ასოციაციის თაოსნობით სხვადასხვა სკოლების მასწავლებლებისა და მოსწავლეთათვის დაიგეგმა საინფორმაციო და შემეცნებითი ტურები SANGU-ს ლაბორატორიებში, სადაც მოსწავლეები სადემონსტრაციო და ლაბორატორიულ ექსპერიმენტებში ჩაერთვებიან.
წმ. ანდრიას ქართული უნივერსიტეტი საქართველოს ფიზიკის მასწავლებელთა ასოციაციას ულოცავს შინაარსობრივად და სამომავლო გეგმებით დატვირთული პირველი საერთო კრების ჩატარებას და წარმატებებს უსურვებს.
