21 თებერვალს, წმ. ანდრიას ქართულ უნივერსიტეტში, პროექტის „აღმოაჩინე შენი პროფესია“ ფარგლებში, გაიმართა შეხვედრა უფროსკლასელებისთვის, რომლებიც დაინტერესებულნი არიან სამართლის სფეროთი. ღონისძიება წარმართა SANGU-ს სამართლის საბაკალავრო პროგრამის თანახელმძღვანელმა, სამართლის დოქტორმა და საქართველოს საკონსტიტუციო სასამართლოს მოსამართლემ ევა გოცირიძემ.
მოსწავლეებს მიესალმა SANGU-ს რექტორი, ფილოსოფიის მეცნიერებათა დოქტორი, ირაკლი ბრაჭული და სამართლის პროგრამის კოორდინატორი ქეთევან ხურცილავა. რექტორმა აღნიშნა, რომ SANGU აქტიურად უჭერს მხარს ახალგაზრდების განათლებას და კარიერულ განვითარებას, მსგავსი ინიციატივები მათ ეხმარება პროფესიული არჩევანის უკეთ გასაგებად. მან ასევე ხაზი გაუსვა უნივერსიტეტის როლს სამართლის სფეროს განვითარებაში და სტუდენტების მხარდაჭერაში.
შეხვედრის თემა იყო „პროფესია მოსამართლე“, რომლის ფარგლებშიც ქალბატონმა ევამ მოსწავლეებს გაუზიარა საკუთარი პროფესიული გამოცდილება და ესაუბრა მოსამართლის როლის მნიშვნელობაზე. მან დეტალურად განიხილა კარიერული განვითარების გზები, გამოწვევები და შესაძლებლობები, რაც სამართლის სფეროში მოღვაწე პირებს ელით. ისაუბრა იმ უნარებსა და მიდგომებზე, რომლებიც აუცილებელია წარმატებული სასამართლო კარიერისთვის და განმარტა, როგორ იწყება და ვითარდება მოსამართლის პროფესიული გზა.
მოსწავლეებს შესაძლებლობა ჰქონდათ შეხვედრის ბოლოს დაესვათ შეკითხვები და მიეღოთ ამომწურავი პასუხები. დისკუსიის ინტერაქტიულ ფორმატში ჩატარებამ მათ საშუალება მისცა უკეთ გაეცნოთ სამართლის პროფესია და გაეაზრებინათ საკუთარი მომავალი შესაძლებლობები ამ სფეროში.
პროექტი „აღმოაჩინე შენი პროფესია“ SANGU-ს ინიციატივაა, რომელიც მიზნად ისახავს ახალგაზრდებს გააცნოს უნივერსიტეტის საბაკალავრო პროგრამები, სხვადასხვა სფეროები და დაეხმაროს მათ პროფესიული ორიენტაციის განსაზღვრაში. კამპანია გრძელდება და მომავალშიც მოიცავს მრავალ საინტერესო შეხვედრას სხვადასხვა დარგის წამყვან პროფესიონალებთან.
