სტიპენდიანტთა სამეცნიერო კონფერენცია SANGU-ში

სტიპენდიანტთა სამეცნიერო კონფერენცია SANGU-ში

9 ივნისს, SANGU-ში გაიმართა ბიზნესის, კომპიუტინგისა და სოციალურ მეცნიერებათა სკოლის სტიპენდიანტთა სამეცნიერო კონფერენცია.

რექტორი, პროფესორი ირაკლი ბრაჭული მიესალმა აუდიტორიას, მიულოცა სტიპენდიანტებს მიღწეული წარმატებები და ხაზი გაუსვა კვლევითი უნარების განვითარების მნიშვნელობას თანამედროვე აკადემიურ გარემოში.

სესია გახსნა სკოლის დეკანმა, პროფესორმა ლევან ქისტაურმა. მან წარადგინა სტიპენდიანტები, ისაუბრა მათი აკადემიური წარმატებებისა და სტიპენდიანტთა ყოველ სემესტრულ სამეცნიერო კონფერენციად ჩამოყალიბებული ტრადიციის მნიშვნელობაზე.

კონფერენციაზე სტიპენდიანტებმა საკუთარი სპეციალობიდან გამომდინარე მოამზადეს და წარადგინეს კვლევითი მოხსენებები:

• კომპიუტერული მეცნიერებების მე-4 სემესტრის სტუდენტმა, გიორგი ცქიფურიშვილმა ისაუბრა თემაზე – „მომხმარებელთა მონაცემების უსაფრთხოება“;
• ფსიქოლოგიის მე-4 სემესტრის სტუდენტმა, მედეა გოგილაშვილმა წარმოადგინა მოხსენება – „თაობებს შორის კომუნიკაციის პრობლემები“;
• ბიზნესის ადმინისტრირების მე-2 სემესტრის სტუდენტმა, შოთა ქურდოვანიძემ განიხილა აქტუალური საკითხი – „შრომითი მიგრაციის გავლენა საქართველოს ეკონომიკაზე“;
• კომპიუტერული მეცნიერებების მე-6 სემესტრის სტუდენტმა, გიორგი ფირცხალავამ წარადგინა ნაშრომი – „ბუნებრივი ენის დამუშავება (NLP)“;
• ფსიქოლოგიის მე-2 სემესტრის სტუდენტმა, ნინო ბუბაშვილმა ისაუბრა თემაზე – „მეხსიერების მანიპულაცია და ცრუ მოგონებები“.

კონფერენცია კითხვა-პასუხის რეჟიმში აქტიურად და საინტერესოდ წარიმართა.

დასასრულს, პროფესორმა ლევან ქისტაურმა მადლობა გადაუხადა სტუდენტებს გამორჩეულად საინტერესო და თანამედროვე საკითხებზე წარმოდგენილი კვლევებისთვის.

სტიპენდიანტებს გადაეცათ სერტიფიკატები და უნივერსიტეტის ბრენდირებული საჩუქრები.