სანგუს ფსიქოლოგიის პროგრამის ხელმძღვანელების საერთაშორისო აღიარება

სანგუს ფსიქოლოგიის პროგრამის ხელმძღვანელების საერთაშორისო აღიარება

საქართველოს საპატრიარქოს წმ. ანდრია პირველწოდებულის სახელობის ქართული უნივერსიტეტის ფსიქოლოგიის საბაკალავრო და სამაგისტრო პროგრამების ხელმძღვანელებმა, პროფესორებმა დიმიტრი ნადირაშვილმა და თეა გოგოტიშვილმა, მონაწილეობა მიიღეს საერთაშორისო სამეცნიერო კვლევით კონფერენციაში „Open Science HUB 2025“, სადაც მათ გადაეცათ ედუარდო ჯუსტის პრემია ფსიქოთერაპიის კვლევაში განსაკუთრებული წვლილისთვის.

Open Science HUB 2025 წარმოადგენს საერთაშორისო სამეცნიერო პლატფორმას, რომელსაც ხელს უწყობს კამპანიის რეგიონის ფსიქოლოგთა ორდენი და ორგანიზებას უწევს ასოციაცია Phenomena HUB APS. პროექტის მიზანია ხელი შეუწყოს მეცნიერებაში გამჭვირვალობას, ცოდნის გაზიარებას და კვლევითი საქმიანობის განვითარებას ღია მეცნიერების პრინციპების შესაბამისად.

ღონისძიება მოიცავდა ორ ეტაპს:

• 7 ნოემბერს გაიმართა ონლაინ სესია, სადაც 150-ზე მეტმა საერთაშორისო მკვლევარმა წარადგინა საკუთარი ნაშრომი;
• 8 ნოემბერს, Palazzo Criscuolo-ში (Torre Annunziata, იტალია), გაიმართა მთავარი სამეცნიერო დღე, სადაც პროფესორებმა დიმიტრი ნადირაშვილმა და თეა გოგოტიშვილმა წარადგინეს ერთობლივი მოხსენება თემაზე: „ფენომენოლოგიის ხელოვნებიდან სამეცნიერო კვლევამდე“.

ჯილდო პროფესორებს პირადად გადასცა ედუარდო ჯუსტის მეუღლემ, ხოლო პრიზის ვიზუალური სიმბოლო, ვეზუვის ვულკანის ფერადი ფოიერვერკებით შთაგონებული ნამუშევარი, შექმნილია გამორჩეული იტალიელი არტისტისა და კინემატოგრაფისტის მარიო ამურას მიერ.

სანგუ გულითადად ულოცავს პროფესორ დიმიტრი ნადირაშვილს და პროფესორ თეა გოგოტიშვილს მიღწეულ წარმატებას, საერთაშორისო სამეცნიერო აღიარებასა და უნივერსიტეტის ღირსეულად წარმოჩენას საერთაშორისო აკადემიურ სივრცეში.