2026 წლის 18 მაისს, წმ. ანდრიას ქართულ უნივერსიტეტში ჰუმანიტარულ მეცნიერებათა და სამართლის სკოლის ორგანიზებით გაიმართა სტუდენტური კონფერენცია - „ქართველი დიპლომატები“.
კონფერენცია მიეძღვნა ქართველი დიპლომატების, საზოგადო მოღვაწეებისა და ისტორიული პირების საქმიანობისა და მემკვიდრეობის განხილვას. მონაწილეებმა წარმოადგინეს მოხსენებები ქართული დიპლომატიის ისტორიისა და საერთაშორისო ურთიერთობების სხვადასხვა ასპექტის შესახებ.
ღონისძიება გახსნა წმ. ანდრიას ქართული უნივერსიტეტის რექტორმა, ფილოსოფიის მეცნიერებათა დოქტორმა, პროფესორმა ირაკლი ბრაჭულმა, რომელმაც სტუდენტებსა და მონაწილეებს მიმართა მისასალმებელი სიტყვით და ისაუბრა ქართული დიპლომატიის ისტორიის კვლევის, ეროვნული მეხსიერების შენარჩუნებისა და ახალგაზრდების აკადემიურ საქმიანობაში აქტიური ჩართულობის მნიშვნელობაზე. რექტორმა განსაკუთრებული ყურადღება გაამახვილა მსგავსი სტუდენტური კონფერენციების როლზე კრიტიკული აზროვნების, კვლევითი უნარებისა და პროფესიული განვითარების ხელშეწყობის მიმართულებით.
კონფერენციაში მონაწილეობდნენ წმ. ანდრიას ქართული უნივერსიტეტის, სოხუმის სახელმწიფო უნივერსიტეტის, საქართველოს ტექნიკური უნივერსიტეტის, სულხან-საბა ორბელიანის უნივერსიტეტისა და ივანე ჯავახიშვილის სახელობის თბილისის სახელმწიფო უნივერსიტეტის სტუდენტები.
სტუდენტებმა ისაუბრეს ისეთი ისტორიული პირებისა და დიპლომატების შესახებ, როგორებიც არიან ნიკო ნიკოლაძე, აკაკი ჩხენკელი, ევგენი გეგეჩკორი, სულხან-საბა ორბელიანი, ფარსადან გორგიჯანიძე და სხვები.
