ქართული ფოლკლორის სამეცნიერო-კვლევითი ცენტრი

საქართველოს საპატრიარქოს წმ. ანდრია პირველწოდებულის სახელობის ქართულ უნივერსიტეტში 2010 წელს დაარსდა და ფუნქციონირებს ქართული ფოლკლორის სამეცნიერო კვლევითი ცენტრი. ცენტრის მიზანია მრავალსაუკუნოვანი ქართული ზეპირსიტყვიერების დღემდე სათანადოდ შეუსწავლელი საკითხების წინ წამოწევა, კვლევა და პოპულარიზაცია; არამატერიალური კულტურული მემკვიდრეობის ულევი „მარაგიდან“ იმ მხატვრული თავისებურებებისა თუ რწმენითი პლასტების აქცენტირება, რომელთა გათვალისწინების გარეშე შეუძლებელია ქართველთა მსოფლმხედველობის ერთიანი სურათის შემუშავება.

ცენტრის ამოცანები:

• საქართველოში და მის ფარგლებს გარეთ (საინგილო, იმერხევი, ფერეიდანი...) აქამდე უცნობი ხალხური სიტყვიერების ნიმუშთა მოძიება, ჩაწერა, თემატურ-ჟანრობრივი კლასიფიკაცია და შესწავლა;
• შეგროვილი მასალის გამოყენებით მონაცემთა ბაზის შექმნა;
• ქართული ზეპირსიტყვიერების ადგილისა და ფუნქციის განსაზღვრა ინტეგრაციისა და გლობალიზაციის საყოველთაო პროცესების პირობებში;
• ქართული ფოლკლორის ენციკლოპედიური ლექსიკონის მომზადება;
• ეროვნული სიტყვიერების მხატვრულ-შემეცნებითი ღირებულების გაცნობა უცხოელ სპეციალისტთა და დაინტერესებულ პირთათვის.