2018 წლის 22 ნოემბერს ქართულ უნივერსიტეტში გაიმართა შეხვედრა თანამედროვეობის გამორჩეულ ქართველ პოეტთან თემურ ჩალაბაშვილთან.
შეხვედრა მისასალმებელი სიტყვით გახსნა უნივერსიტეტის რექტორმა პროფესორმა სერგო ვარდოსანიძემ, რომელმაც დაახასიათა თემურ ჩალაბაშვილის, როგორც პოეტისა და მოქალაქის ღვაწლი ქართული კულტურის წინაშე და უნივერსიტეტისაგან სამახსოვრო საჩუქარი გადასცა პოეტს.
თემურ ჩალაბაშვილის შემოქმედების მხატვრულ თავისებურებებზე ისაუბრა ფილოლოგიის დოქტორმა ლევან ბებურიშვილმა, რომელმაც აღნიშნა, რომ პოეტი ქართული პატრიოტული ლირიკის საუკეთესო ტრადიციების გამგრძელებელია. თემურ ჩალაბაშვილის შემოქმედება გულიდან მომდინარე პოეზიაა, რომელსაც ორიგინალური ხელწერის ბეჭედი აზის და თავისი უშუალობით, მძლავრი პათოსით ხიბლავს მკითხველს.
თემურ ჩალაბაშვილის პოეზიის აკადემიზმზე საგანგებო ყურადღება გაამახვილა პოეტმა ქეთევან შენგელიამ. მისი თქმით, როდესაც თანამედროვე უმწიფარ ხელოვანთა ერთი ნაწილი ებრძვის კონვენციურ ლექსს, თემურ ჩალაბაშვილის პოეზია თავისი აკადემიურობითა და თვითმყოფადობით ორიენტირი უნდა იყოს სიახლის მაძიებელი ახალგაზრდა პოეტებისთვის.
თემურ ჩალაბაშვილის, როგორც პიროვნებისა და შემოქმედის ღვაწლზე ისაუბრეს: პროფესორმა ტარიელ ფუტკარაძემ, პროფესორმა ამირან არაბულმა, პროფესორმა როლანდ თოფჩიშვილმა, პროფესორმა დავით ბოსტოღანაშვილმა.
შემდეგ სიტყვა გადაეცა თავად პოეტს, რომელმაც თავისი მრავალფეროვანი შემოქმედებიდან რჩეული ლექსები წაუკითხა მსმენელებს.
შეხვედრა კითხვა-პასუხის ფორმატში გაგრძელდა. თემურ ჩალაბაშვილმა უპასუხა დამსწრეთა შეკითხებს.
შეხვედრის დასასრულს კომპოზიტორმა და მომღერალმა ია მაისაიამ შეასრულა პოეტის ლექსზე შექმნილი სიმღერა.
