2016 წლიდან ქართული უნივერსიტეტი ჩემი ყოველდღიური ცხოვრების განუყრელი ნაწილია. ეს არის ადგილი, რომელიც სტუდენტებს გვაძლევს საშუალებას, ხარისხიანი უმაღლესი განათლების მიღების პარალელურად წვლილი შეიტანოს ჩვენი პიროვნული ფასეულობებისა და მსოფლმხედველობის განვითარებაში.
ქართულ უნივერსიტეტში ჩაბარება გადავწყვიტე, რადგან ვიცოდი თუ როგორი აკადემიური პერსონალით იყო იგი დაკომპლექტებული, თუმცა ბუნებრივია მქონდა გარკვეული შიში იმისა, რომ შეიძლებოდა მოლოდინები არ გამმართლებოდა. საბედნიეროდ, უნივერსიტეტის ოჯახურმა გარემომ და აქ გატარებულმა დღეებმა ყოველგვარი შიში გამიქარწყლა და უკვე მესამე წელია რაც წარმატებულად ვსწავლობ ქართული უნივერსიტეტის ბიზნესის, კომპიუტინგისა და სოციალურ მეცნიერებათა სკოლის ეკონომიკის პროგრამაზე.
აუცილებლად უნდა აღვნიშნო, რომ უნივერსიტეტში არის მრავალფეროვანი სტუდენტური ცხოვრება. ხშირად ეწყობა დისკუსიები და კონფერენციები, სადაც აქტიურად ვარ ჩართული, ასევე ხდება იმ სტუდენტების წახალისება, რომლებსაც გვაქვს მაღალი აკადემიური შეფასება. ამავდროულად მნიშვნელოვანია ისიც, რომ ინტენსიურად მიმდინარეობს სხვადასხვა წარმატებული და კომპეტენტური ადამიანების მოწვევა და მათი სტუდენტებთან კომუნიკაცია, იმართება საჯარო ლექციები, ტარდება ტრენინგები, სადაც სტუდენტებს საშუალება გვაქვს ცოდნასთან ერთად შევიძინოთ ახალი გამოცდილებაც. პირადად მე მივიღე უნივერსიტეტში ჩატარებულ 2 ტრენინგში მონაწილეობა, ესენია: Iთ პროექტების მართვა და ტრენერთა ტრენინგი, რომლებმაც ბევრი საინტერესო ინფორმაცია შემძინა.
ქართულმა უნივერსიტეტმა, აქ გატარებული დროის მანძილზე, ბევრი რამ შემმატა: სხვადასხვა სტუდენტურ კონფერეციებში, ტრენინგებსა თუ პრეზენტაციებში მონაწილეობამ საშუალება მომცა, გამომემუშავებინა ახალი უნარ-ჩვევები, უკვე არსებული კი გამეუმჯობესებინა. დარწმუნებული ვარ, ის ცოდნა, რაც ამ უნივერსიტეტის კედლებში მივიღე, მომცემს საშუალებას განვახორციელო ჩემი სამომავლო გეგმები - გავხდე წარმატებული და თვითრეალიზებული ჩემს პროფესიაში.
მარიამ ქვარიანი
ბიზნესის, კომპიუტინგის და სოციალურ მეცნიერებათა სკოლის ეკონომიკის მიმართულების სტუდენტი
